Plantun de Prouvènço

Pèr coumpara dos planto d'encò nostre

Rumex roseus & Euonymus europaeus

Eigreto(-de-mar)

Rumex roseus

Polygonaceae

Autre noum : Eigreto(-de-Tanger).

Nom en français : Rumex de Tanger.

Descripcioun :
Aquesto eigreto trachis dins li duno de sablo en ribo de mar. Se recounèis à si fueio astado emé dos auriheto à la baso e de bord merleta. La tijo èi proun ramificado e lou port èi souvènt rebaladis. Li flour soun en espigo flaco de coulour roso.

Usanço :
Couneissèn pas d'usanço particuliero, mai poudèn pensa que l'eigreto-de-mar èi manjadisso coume lis àutri paciènci. Esciéure au site se n'en sabès mai. Ramentan que faudrié pas trop n'en manja malodi l'acide óussali.

Port : Erbo
Taio : 30 à 60 (90) cm
Fueio : alterno
Tipe bioulougico : Emicriptoufite
Cicle bioulougico : Planto renadivo

Gènre : Rumex
Famiho : Polygonaceae

Ordre : Caryophyllales

Coulour de la flour : Roso
Petalo : 3
Ø (o loungour) flour : Pancaro entresigna
Flourido : Printèms - Estiéu

Sòu : Ca
Autour basso e auto : Pancaro entresigna
Aparado : Noun

Liò : Mar - Sablo
Estànci : Mesoumediterran
Couroulougi : Pancaro entresigna
Ref. sc. : Rumex roseus L., 1753

Bounet-de-capelan

Euonymus europaeus

Celastraceae

Àutri noum : Fusan, Coulougnet, Grano-pesoulino.

Noms en français : Fusain, Fusain d'Europe.

Descripcioun :
Lou bounet-de-capelan es un aubret que trachis dins li relarg fres e proche d'aigo. Fai de fueio longo de 2 à 10 cm e de pichòti flour en crous de 6 à 10 mm. Mai se recounèis subretout emé si fru que sèmblon li bounet que pourtien, à passa tèms, li capelan. Aquéli soun roso e quàsi redoun sus lou dessubre e caupon 4 grano. Coumpara emé lou bounet-de-capelan-di-làrgi-fueio qu'èi pentamèro.

Usanço :
Couneissèn pas d'usanço particuliero en Prouvènço pèr aquelo planto. Pamens se saup qu'es emé soun bos cabounisa que se fai lou fusan pèr lou dessin. Dins d'ùni relarg se servien di fru pèr tencha en rouge.